Thursday, January 29, 2015

Duh-ai-sam kim thei silo!


November '08 thlatawp lamah chak leh phur em em in Hyderabad atangin Mizoram lam panin ka haw a. Zinkawng ah pawh harsatna leh buaina em em tawk lovin dam takin Aizawl ka thleng a, a lawmawm khawp mai. Ka haw hma chuan duhthu mahni a samin ka haw hun chuan 'chumi kha mi chu ka ti ang a, chutiang khatiang chuan ka awm ang te' ti te in awmdan tur te ka duang lawk ve a. Mahse, mihring te hi kan duhthusam vek in awm theih loh tih ti chiang turin nge keiman ka la hriatthiam tawk loh vang zawk? Engkimah erawh duhthusam leh lo duan lawk ve ang a nun hman erawh a theih loh tih ka hrechiang ve ta khawp mai.

Kum 3 zet Krismas leh Kumthar pawh vairam ah a zawnin ka hmang a, kumin chu mahni khua ah ngei ka hmang ang ka ti ve ran ran a. Ka han hmang ta cheng a, beisei ang leh nghahhlelh ang em em phei chuan a nuam lutuk pawn ka hmang in ka hre lem hlei lova. A chang chuan thiante bula awm ai chuan mahni a awm te hi nuam zawk te ka ti a, mahse thiante bula han awm chuan kan lo in ngaina hle a ni tih ka hrechhuak leh lawi a. Thil tihna (kohhran/khawtlang etc) ah tel ila hman kha ang tawh lovin ka hria a, ava nuam tawh lo ti ngawt ila, hmundang han thlakhlelh tur ka neih ka hre chuang silova! Engkim hi a ho vek ni te hian ka hria a, mahse chutiang chu rilru put dan tur a ni lo tih te chu ka chhia leh tha hriatna chuan min hrilh nawn ve tho bawk a.
Kum a liam zel thin ang hian kan mihring nun te pawh hian nitin hian thil hlui leh thar hrethiam turin min lo kalpui ve zel thin. Tumkhat phei chu ka thianpa nen Krismas hma deuh khan kan khaw ram phul hmun nuam deuh "Batling Tlang" ah khua va chuan teh ang kan ti a, nileng deuh thaw kan vak dun a, thuthmun rem pahin lunglen na hrang hrang kan sawi kai chhova, mihring nun inthlak chhohdan te leh a tawp ah chuan engmah hi a kumhlun lo ani tih te kan sawi a. Chuta tanga ka ngaihtuahna a lo lut nghal chat chu kan zirlai a Vedic scociety a nun kal chhoh zel dan (asramas) hrang hrang an then- Brahmacharya, Grihastha, Vanaprastha, Sannyasa . Atan tirh ah- zirna, chutah mahni a din a chhungkaw din, khawvel thil kalsan, mahni a nun a khawvel lak ata hranna chatuan chawlhna a luh. Hetiang ang deuh hi a kan nun awmzia chu nimai in ka hria.

Khawvel ah hian duhthusam ang rengin awm theih ani lova, Bible a kan hmuh Mosia Tawngtaina "Kan damchhung nite chhiar dan tur min zirtir ang che, finna thinlung kan neih phah hial na turin" tih hian awmzia a lo nei ril hle mai!

No comments:

Post a Comment

HRINGNUN ZIRLAI: HMEICHHE PAKHAT SA SEMCHHUAHNA HMUNA THAWK CHU

Ni khat chu hmeichhe pakhat sa semchhuahna hmuna thawk hi, a hna thawh tur a thawh zawh hnu chuan sa dahthatna/dahvawhna pindanah chuan va e...