Luah loh lung di nei lo awm tak ang maw?

Lalhmingliana office bang chuan kar khat dawn fur khawcheng  kara tlai lama khua rawn tha thut chu  a thian that em vangin thingpui in pah in tukverh lam hawi chuan khua a thlir vang vang a. A awmpui pa chuan thut khawmna pindan lamah in leng a neih thu a rawn hrilh hnu chuan a phei ve nghal mai bawk a. A in leng te chuan an khaw High School kum 50 tlinna Golden Jubilee lawmna a khuallian tur a an rawn sawm chu lo niin. Amah Hminga sawm tur chuan tuna a hnathawhna atanga  darkar 5 dawna a hla atang a ruahsur hnuai an rawn sawm chu hnial chi niin a hre lova, a remchan tur thu in a lo thlah ta hlawm a.

Kar khat aliam hnu chuan  a bial chhunga High School pakhat Golden Jubilee lawmna hun hman pui tur chuan a driver nen chuan zing hma tak ah an in khalh chhuak ve ta a. Motor a chuan pah chuan Hminga chuan a thusawi tur ngaihtuahin a ngawi vang vang a, kawng chanve vel an tlan tawh tih ah chuan a driver chuan Hminga chu car tape play a dil ta a, a lo rem ti ve mai bawk a. Chumi tuk a a driver hla play chu ngaihtuah lem lovin a a thusawi tur leh an kalna tur programme vel ringawt a rilru ah awm a, mahse  hla pakhat chuan a ngaihtuahna a la peng ta zak mai. Chu hla chuan a nunhlui a hriatchhuah tir a, a lehkhazir lai te, thianhlui te hmel te a mitthla ah lo lang, kum tam tak a lo ngaihtuah duh ngai tawh lo hmel hlui a rawn lang tel ta uar uar mai. A thinlung a hneh ngang aniang a driver hnen ah chuan a play nawn tir leh ta hial a. An kalna tur khua hi kum 14 hmalam khan a chanchin a lo hre ve fo tawh thin reng a ni.

Hminga rilru ah thil dang reng a leng thei tawh lo, Aizawl a lehkha zir tur a awm tirhin an Sikul ah hmelhriat pawh nei lova a awm lai a amah lo be pawp a lo kawmnel tu hmasa ber nu kha he Sikul atang hian matric a pass chhuak tih hrilh nawn leh a ngai chuang lo. Hminga kha thingtlang rawlthar tih tak ah, khawpui ah sikul a lut ve a, mi inthlahrung chi a lo ni bawk nen tumah pawh kawmnel ngam lovin a awm ve tawp a, chawlhlawk lain Thani leh a thiannu ten a ngawi reng  a lo thu an rawn be pawp kha a ni a. Khami ni atang khan Thani chu atan thiantha a ni tan a, kha sikul a an kal ho chhung khan a hu ho leh fianrial  deuh te pawh in  hun an hmang liam dun ve nasa thin a ni. 

Thani kha a pa hnathawh na thingtlang ah Pawl 10 zirin he khaw High School atang ngei hian Matric a pass chhuak tih tunhma lam khan Hminga hnen ah a lo sawi tawh a, khang hun lai khan Hminga tan chu khua chuan awmzia a nei em em ngai lo. Mahse, Thani nen an inkawm ngeih tawlh tawlh a chu khaw high school chanchin chu a hre zing ta khawp mai. Khawpui atanga thingtlanga insawn thut Thani tan chuan sawi tur a tam lo thei lo bawk a ni. Hminga nen an inkawm ngeih em avangin College pawh hmun khat ah an la kal dun zel a. B.Sc 2^nd Year an zir dun laiin Thani chu a chhung ten Ludhiana ah B.Sc (Agri) zir turin an kal tir ta daih a. A awm tirh chuan lehkha te pawh an in thawn ve zak zak thin a ni. Hminga pawh B.Sc a zova an khaw bul sikul ah zirtirtu turin an sawm a, an chhungkua an awmtheih vak bik loh avangin a nu leh pa thu zawmin a thawk ve ta daih a.

Hminga pawh sikul chawlh lai den chhen in MCS exam a tum ve avangin Aizawl a kal a, Bara Bazar ah lehkhabu vel a lo en lai chuan  kum 2 zet a lo hmuh tawh loh Thani nen an in hmu leh hlawl a, inkawm ngeih tak lo ni tawh thin kha  in hmu khat ta chu in zah na deuh a lo awm tawh a sawi tur an haihchham dun ve khawp mai. Thani chuan karleh mai a an zirna hmun ah Project report pe tur a chhuk leh tur thu hrilhin remchang a an In a leng turin a hrilh a. Hminga chuan chumi zan chuan Thani te In ah chuan  a va leng a, mahse veng kar a hlat tham deuh avang in rei pawh a leng thei ta lova. Chumi zan chu Thani nen a mumal tak a an inhmuh hnuhnun ber a ni ta bawk.

A kum leh ah chuan a pate a ten In an sak lai a lo ni bawk  vangin Hminga pawh Aizawl ah result nghah pahin a cham hrih a, dawr atangin a patea fa te pahnih nen cement an zawn laiin Thani leh a thian  pakhat dawr danga thil an lei lai a hmu a, mahse hnathawh kawr paw chuai nen a va biak buai a tim ve deuh a vangin a kal pel ta mai a. Khami ni a Thani a hmu leh kher kha chuan a thinlung a awm fo thin thil a rawn chawk nung leh chiang kher mai. Tlangval inthlahrung leh ze zawi chi Hminga chuan chu thil rawn irh thar leh chu a ngai te te in a ngawihbo pui leh ta thova.  A vannei a result a lo chhuak a ti hian kum 6 chuang zet chu BDO hna thawk in a lo awm ve ta chu a ni a. Tumkhat  chu an Department thil ah training an neih tumin Thani nau Remi nen Aizawl ah an in hmu a, a u Thani’n pasal a neih dawn thu leh sawmna card pawh an sem chhuah tan tawh thu a hrilh a. Khami ni khan Hminga khan Remi sawmna kha ngaipawimawh in Thani te In ah khan peng kawi ve ta se Thani mi nupui la ni lo kha hmuh na hun a la nei ve ngei awm si a. 

Hminga te putu pawh an kalna tur khua an thleng dawn hnai ta, khaw luh dawn hnaih ah zunram thiarin an ding zawk a. An car tape chuan ‘tawnmang em ni lunglem ka nei lo, ka hawi vel a ka tawng silo…zun leng erawh a cham tang lai ah…’ tih hla a la rawn sa ve mek bawk a.  Chumi tum a zinkawng chuan Thani a hriat chhuah tir a, mahse hrechhuak turin thian an nih bak Thani bulah thildang reng sawi a nei chuang bawk silo. Mahse Hminga hian sawi ngam ta se chuan Thani awmdan thin atanga chhutin  a haw dawn miah si lova. Thani sikul lo kal chhuah tawhna thin hmun ngei a kal tur chu phurna leh zamna in a rawn tuam a, a ma hriattur tawk lek a zawiin “hmm…luah loh lung di nei lo awm tak ang maw?"  tiin a phunsap a, motor ah chuan a lawn leh ta a…..
-----------
- Mizo thawnthu - Mizo love story -