Zaipawl kan ti ta sa sa....

US President Barack Obama India ram a lo kal khan 8 November 2010 zan a President Pratibha Patil in  Presidential banquet Rashtrapati Bhavan a buatsaih ah khan kan hmarchhak unaute zing a mi Shillong Chamber Choir zai tur a sawm an ni a. An zai hma a NDTV Studio  a an hlasak tur an lo sak lawk na video ka lo en ve a, an zai ngaihthlak a nuam in an chhuanawm hle mai. Shillong Chamber Choir te zai ka ngaihthlak hnu a ka rilru a thil lo awm ta daih chu Mizo nula leh tlangval te hetiang hian kan zai ve thei tih hi a ni.  An zai hi an chhuanawm ka ti a, mahse Mizo zaipawl kan lo ngaithlak ve tawh thin leh music video kan neih ve te tam tak te ai erawh chuan an thiamna bik ka hre chuang bik miah lo thung. Mahse an ni hi ngatinge heti tak a India ram mai bak ah khawvel hmun dang atang pawh a hriat an hlawh bik ni ang le? A chhanna chu an ni zawngin a ngaihna an hria a, an thiamna(talent) chu eizawnnan an hmang mai a ni. Kan ram ka thlir a, kan veng/kan khua/kan kohhran/kan branch YMA zaipawl etc., ah pawh han in zir ngun deuh se an ni ai mah a zaithiam zawk tur leh thleng sang thei zawk tur an kat nuk in ka suangtuah pha ve thin a ni.

http://www.treorchymalechoir.com/perform/tonic.htm

Mahse...! 

Suangtuahna chuan chung hial chu thleng thin mahse a tak ram ah chuan kan zaithiam te thlen chin erawh chuan eizawnna atana hman tlak tak kawng a la dai pha si lo a ni. Local channel a en tur a music video mawi tak tak leh ngaithlak nuam tak tak chu kan Mizo zaithiam te ah hian an tam ve ta khawp mai. Mizo te chu zai ngaina hnam, chhiat leh thatni ah pawh zai tellova thil ti thei lo, mi panga paruk awm tawh na ah chuan guitar perh thiam hla han la mai thei leh mi zai rual a tenor emaw contralto a lo zawm ve thei mai an awm deuh zel ti ila, kan sawi sual tam lovang. Rimawi pawh kan ngaina tlang, keini ang zaithiam uk lo pawh hian a ngaihthlak lam chu kan peih khawp mai. Lung a han len fuh chang te phei chuan  kei ni ang duang pawh hian a kel rawl a kel rawlin Mizo zai mai bakah tupuiral lam hla te, khawchhak leh vai hla thlengin kan luanliam  pui ve chang te pawh a awm leh khauh thin. A bikin Mizo thalai te hi han ti ti ila khawvel a zaithiam lar chin ngat phei chu hriat nei reng reng lo an awm lo tawp ang. Zai kan ngaina a, zaithiam kan lawm a, zai leh rimawi hmangin kan inkawm khawm thin a nih hi. Chuti taka zai leh rimawi ngaina hnam chu khawvel hriat khawp a larchhuak erawh vanduai thlak takin kan la awm hrih lo a ni.

Dawnchiang deuh ang u!

Kohhran Thalai (KTP/TKP/SAY/PYD etc.) active deuh tan chuan tih fuh chang phei chuan chawlhkar tin deuh thaw zaipawl hla zir tur a awm thin a ni. Zaipawl chi hrang hrang pawh kan ngah na rawh-Kohhran zaipawl, bial zaipawl, central choir, Synod Choir, BCM choir, YMA zaipawl, Sub.Hqtr zaipawl etc. kan ti, zaipawl tin deuh thaw khawpui leh thingtlang lam thlengin mahni a pualin music video pawh kan nei deuh zel. Heti khawp a kan ram thalai ten kan buaipui leh ngaihsan zaipawl hi Biak In emaw programme danga vawi hnih khat kan sak thin mai bak ah hian a hman tangkai dan a awm thei dawn lawm ni le? Kan Khasi unau te chuan ti hian khawvel a ramropui ber ti a an sawi mek US President te nupa hma zaipawl hla sa in an dingchhuak tawh si a. Chu chang a ni lova zaipawl atang hian sum tam tak leh hmingthanna hial pawh an hlawh chhuak a ni. Kan ram ah a bikin kohhran thalai zaipawl te hi a kalphung tlem a ti danglamin kohhran a zai mai bakah hian a sum leh pai hlawh chhuak zawnga kal pui theih dan a awm thei ve tho angem le? Dik tak a sawi chuan thil dang tih thulh hial khawpin hlazir leh inbuatsaih nan kan hun te kan hmang awllo tho si a, hetianga kan hun kan hman tak rau rau ah chuan tunlai khawvel mi ten eizawnpui tlak (professional) tur hawi zawng a thil an kalpui mek lam hawi a ke kan pen ve a hun ta khawp mai.

Huang zauh hlek angai ang!

Mizoram a zaipawl tha kan neih te hi  a tam ber chu kohhran behchhan a kohhran mal zaipawl emaw bial zaipawl etc te an ni tlangpui a kan hlasak thin pawh Pathian fakna atana zir leh hlan thin kan ni. Shillong chamber choir te hlasak hi en ta ila, keinin a Pastor/Kohhran Upa te sunna hla atan a kan hman thin saphla 'Deep river, my home is Jordan' tih hla a Mizotawnga 'Jordan lui ral ah ka In a awm' tih atanga bul tanin a tawp lam chuan Pathian fakna lam hawi reng reng lo Hindi film hla 'Ye Dosti' tih hla te an han remkhawm kha a ni a, hetiang hla remkhawm chu keini tan sak a theih loh ta nghal pang mai. Pathian fakna hla leh hla lenglawng te remkhawmin kan zaipawl te hian sa ve ta ngat se kohhran mipui kan phun mur mur anga, kan Pastor te leh Upa ten an chungchang ngaihtuah turin committee an koh nghal rum rum duh mai awm asin. Chutiang chu kan huam chin leh kan dinhmun a ni si a kohhran zaipawl ngau ngau chuan khawvel hmun dang ringlo mite zing ah chuan hralh a kal dawn bawk si lo. YMA zaipawl anih lahin tlawmngaia thawh chhuah anih loh chuan a fuhber bawk si lo.

Ti hian ti ta ila!

Khawtin/Vengtin ah hian solfa thiam zaipawl conductor atan hman tlak em em mi pahnih pathum an awm deuh vek awm e, chutiang mi thiam te chuan zaipawl han ho vel chu an harsat lo tlangpui thin a, chungte chuan an veng chhunga zaithiam leh zaipawl a tel awm mi te chu an hre thei viau bawk. An ni hian hma la in kohhran/YMA etc zaipawl tibuai chuang si lovin 'zaipawl' din ve ta mai se, an hlasak tur pawh hla lenglawng leh a tul chuan lengzem hla thleng a sa thei turin zir ta se,  a hun leh hmun mil tur zelin hla nei thei thin ta bawk se. Entirnan, sawrkar programme ah chuan 'Vande mataram' atanga 'Kan zotlang ram nuam' tih te sa turin thiam ta se, MNF ho programme ah chuan "Aw zoram aw kan zoram' tih pawh lo sa ta lawng lawng se, Congress programme a lo nih hun ah "Vaipawl min ti maw, vai buhfai ei theuh theuh' tih te pawh sa ta mai se,. Pawlho inkhawmpui, birthday leh chhungkaw pual deuh bik thil tih na ah a neitute hla duh ang sa thei mai turin in buatsaih ta thin bawk se, tunlai ah mi an changkang tawh a sap tihdan a enge maw ni pawimawh bik a zaipawl hranpa hmanga mipui han awih tlei vel  duh pawh an awm ve nual in a rinawm. Kolkata ah zai atul chuan 'Bengali hla' zir mai se, Guwahati ah zai atul chuan 'Assamese hla' chutiang zelin an ngaithlatu tur mipui te ngainat theih tur an thlang thiam ang a, an tan zaina tur a awm thei zel ang. Tichuan hlazir a tul pawhin sum lakluhna te a lo awm chuan nu leh pa te an phun lem lovang a, an phun lo mai nilovin sum lak luh an lo neih that deuh phei chuan an phur pui zawk ang a, zaipawl member te vengchhunga nu leh pa ten an phur pui chuan an tan thil tih  a lo awlsam ang a, nu hovin tan han la tak tak se zaina tur an hmu awllo mai tur asin.

Zaipawl a lo changtlung tak ah chuan ramchhung mai bak ah rampawn lamah pawh intihsiakna a chhuak  ve thei mai turin an lo in buatsaih tawh ang a, tichuan Shillong Chamber Choir te ang hian khawi emaw lai a Talent Show na hmun a an tel a tul pawn "ka chhungten kal an phal lo" tih a awm lovang ang a, an kal thei lovang tih mawlh an hlau tawh zawk mai dawn a ni. Vengchhung a mi pa/nu chinchang hria leh hawiharh saptawng leh vaitawng pawh harsat lem lo thil tih dan thiam bawksi Manager tur an hmuh theih hlauh phei chuan a tluk a awm thei lovang. Tichuan, ULiana te, Umawii te, Mami leh Mama te ho  tunhma a LPS, ZONET etc chauhva an music video kan lo hmuh thin ten kawlvalenchham atanga Mizoram mipui te hnenah 'kar leh lawk hi final a ni tawh dawn a khawngaihtakin sms hmangin chumi kha mi number ah chuan min lo vote ve dawn nia' an rawn tih hun ah chuan Shillong Chamber Choir chauh ni lo India hmarchhak atang hian zaithiam zawk midang an lo awm a ni tih khawvel hian a takin a lo ngaithla ve tawh dawn a ni. Hmana thenawm vel an hlazir kan hriat thin Mizo nula leh tlangval zaipawl thiam tak tak ten khawvel music producer hming thang tak tak te nen a contract an sign hunah meuh chuan keini ang duang Doh-ray-me pawh lam dik ve hlei thei lo tan pawh zaipawl ngaina tak hnam Mizo kan nih thu tal  hi sawi a nuam ngawt ang le.

-------------------------------
Zaipawl leh zai lama chhuan tur nei eih lo in hetiang thu te ka'n ziak ve tak vak mai chu, at so na chikhat anih loh chuan thahnem ngaihna kawngkhat ah lo ngaih ve mai chi a ni awm e!  Kohhran leh tlawmngai pawl hminga zaipawl neih sawiselna nilovin a kawngdang a awm ve thei lawm ni tih thahnemngaihna zawk in he thu hi ziak a ni e.- Lalzarzoa.